وزیراعظم میاں محمد شہباز شریف نے اسلام آباد میں ہیپاٹائٹس سی کے خاتمے کے لیے متعدد اہم اقدامات کا اعلان کیا ہے۔
ان کا کہنا تھا کہ گزشتہ حکومت نے پنجاب میں ہیپاٹائٹس سی پروگرام کے نفاذ میں رکاوٹیں ڈالیں، لیکن ان کی حکومت نے اس پروگرام کو دوبارہ شروع کر دیا ہے تاکہ اس مرض کا خاتمہ کیا جا سکے۔وزیراعظم نے مزید کہا کہ پنجاب میں ہیپاٹائٹس سی کے خاتمے کے لیے کئی اقدامات کیے گئے ہیں، جن میں پی کے ایل آئی میں پہلے اسکریننگ یونٹ کا قیام شامل ہے، اور اس یونٹ کو ضلع اور تحصیل کی سطح تک پھیلایا جا رہا ہے۔ وزیراعظم نے اس بات کا بھی ذکر کیا کہ گلگت بلتستان کے وزیرِ اعلیٰ کو ہیپاٹائٹس سی کے خاتمے کے لیے خصوصی ذمے داری سونپی گئی ہے۔
اس موقع پر وزیراعظم نے اس بات کا اعتراف کیا کہ وفاقی حکومت نے دیگر اداروں کے ساتھ مل کر اس مرض کے خاتمے کے لیے مشترکہ اقدامات کیے ہیں۔ ان اقدامات میں عالمی ادارہ صحت (WHO) اور آغا خان فاؤنڈیشن کا بھی تعاون شامل ہے، جن کا پروگرام میں کردار بہت اہمیت رکھتا ہے۔وزیراعظم کا کہنا تھا کہ ہیپاٹائٹس سی پاکستان میں تیزی سے پھیلنے والی بیماری ہے، اور اس بیماری کے خلاف جنگ میں حکومت اپنے تمام وسائل استعمال کرے گی تاکہ عوام کو اس کی مہلک اثرات سے بچایا جا سکے۔
