ویب ڈیسک:وزیراعلیٰ پنجاب مریم نواز شریف نے البینزم سے متعلق آگاہی کے عالمی دن (13 جون) کے موقع پر ایک اہم پیغام جاری کرتے ہوئے کہا ہے کہ البینزم کوئی کمزوری نہیں، بلکہ یہ قدرتی تنوع کا حصہ ہے جسے عزت، قبولیت اور محبت کے ساتھ اپنانا معاشرے کی اجتماعی ذمہ داری ہے۔
"البینزم کے شکار افراد خوبصورتی کا روشن پہلو ہیں"
وزیراعلیٰ نے کہا کہ البینزم سے متاثرہ افراد کو کم تر یا مختلف سمجھنا سماجی ناانصافی ہے۔ اُن کا کہنا تھا کہ:"ہم ایسا پنجاب چاہتے ہیں جہاں کسی کو اس کی جلد، ظاہری شکل یا پیدائشی فرق کی بنیاد پر کمتر نہ سمجھا جائے۔"انہوں نے زور دیا کہ البینزم کے شکار افراد معاشرے کی قابلِ احترام اور توجہ کے مستحق شخصیات ہیں، اور ان کے لیے محبت، احترام اور قبولیت کا دائرہ مزید وسیع کرنا ہوگا۔
حکومت پنجاب کے اقدامات
وزیراعلیٰ نے واضح کیا کہ حکومت پنجاب البینزم سمیت دیگر خصوصی افراد کو
مکمل تعلیمی سہولیات،
معیاری طبی امداد
اور معاشرتی تحفظ
فراہم کرنے کے لیے پرعزم ہے۔
امتیازی سلوک کے خاتمے پر زور
مریم نواز شریف نے اپنے پیغام میں مزید کہا کہ البینزم سے متاثرہ افراد کے حقوق کے تحفظ اور ان کے خلاف امتیازی سلوک کے خاتمے کے لیے تمام طبقات کو متحد ہو کر آواز بلند کرنی چاہیے۔
