ممبئی: بالی وڈ اداکار نانا پاٹیکر کے بیٹے ملہار پاٹیکر نے اداکارہ تنوشری دتہ کے متنازع بیان پر ردعمل دیتے ہوئے کہا ہے کہ اس معاملے کو اب ختم سمجھنا چاہیے، کیونکہ یہ قانونی کارروائی کے مراحل سے گزر چکا ہے۔
تنوشری دتہ نے حال ہی میں نانا پاٹیکر کی موت سے متعلق تبصرہ کرتے ہوئے کہا تھا کہ ’شیطان مر گیا‘، جس کے بعد یہ بیان شوبز حلقوں میں زیرِ بحث آگیا۔ ملہار نے اداکارہ کا نام لیے بغیر کہا کہ جس معاملے کو دوبارہ اچھالا جا رہا ہے، وہ پہلے ہی عدالتوں میں طے ہو چکا ہے، اس لیے اسے وہیں چھوڑ دینا چاہیے۔ملہار کے مطابق، لوگ اب بھی اس معاملے پر گفتگو کر رہے ہیں، تاہم وہ کسی سے بحث نہیں کرنا چاہتے۔ انہوں نے ایسے افراد کے لیے نیک خواہشات کا اظہار کرتے ہوئے کہا کہ وہ دعا کرتے ہیں کہ خدا ان کا بھلا کرے۔
تنوشری دتہ اور نانا پاٹیکر کے درمیان تنازع کیسے شروع ہوا؟
یہ تنازع 2008 میں فلم ’ہارن اوکے پلیز‘ کی شوٹنگ کے دوران پیش آنے والے مبینہ واقعے سے متعلق ہے۔ تنوشری دتہ نے الزام لگایا تھا کہ نانا پاٹیکر نے شوٹنگ کے دوران انہیں جنسی طور پر ہراساں کیا، جبکہ نانا پاٹیکر نے ان الزامات کی تردید کی تھی۔سن 2018 میں بھارت میں می ٹو مہم کے دوران یہ معاملہ دوبارہ نمایاں ہوا اور نانا پاٹیکر کے خلاف ایف آئی آر درج کی گئی۔ ممبئی پولیس نے 2019 میں ناکافی شواہد کی بنیاد پر کیس بند کرنے کی رپورٹ پیش کی، جبکہ 2025 میں ممبئی کی اندھیری مجسٹریٹ عدالت نے قانونی مدت ختم ہونے کے باعث فوجداری کارروائی ختم کر دی۔
نانا پاٹیکر کی موت کے بعد تنوشری دتہ کا بیان
نانا پاٹیکر کے انتقال کے بعد تنوشری دتہ نے سوشل میڈیا پر اپنے ردعمل میں انہیں ’شیطان‘ قرار دیا۔ اس بیان پر سوشل میڈیا اور بھارتی شوبز حلقوں میں بحث شروع ہوگئی۔ بعد ازاں تنوشری نے اپنے مؤقف کی وضاحت کرتے ہوئے کہا کہ می ٹو مہم کے بعد انہیں جن حالات کا سامنا کرنا پڑا، وہ ان کے لیے انتہائی تکلیف دہ تھے۔ انہوں نے ماضی کے واقعات اور اپنے تجربات کا بھی ذکر کیا۔
ملہار پاٹیکر نے کیا کہا؟
ملہار پاٹیکر نے اپنے والد کے خلاف الزامات پر دوبارہ ہونے والی گفتگو کے جواب میں کہا کہ متعلقہ مقدمہ پہلے ہی ختم ہو چکا ہے اور عدالتی کارروائی اپنے انجام کو پہنچ چکی ہے۔ انہوں نے واضح کیا کہ وہ اس معاملے پر کسی کے ساتھ بحث نہیں کرنا چاہتے اور ان کے لیے یہی کافی ہے کہ حقیقت اپنی جگہ برقرار رہے۔ملہار نے اپنے والد کے آخری برسوں کا ذکر کرتے ہوئے یہ بھی بتایا کہ نانا پاٹیکر فلموں میں ایک جیسے کردار ادا کرنے کے بجائے نئی کہانیاں پیش کرنے میں دلچسپی رکھتے تھے۔ زندگی کے آخری برسوں میں ان کی توجہ سماجی کاموں، کشمیر میں اسکولوں کے قیام اور کسانوں کی مدد جیسے منصوبوں پر بھی مرکوز رہی۔ ملہار نے اپنے والد کے سماجی کاموں کو آگے بڑھانے کے عزم کا اظہار بھی کیا۔ واضح رہے کہ نانا پاٹیکر 8 اکتوبر 2026 کو گوا میں دل کا دورہ پڑنے کے بعد 75 برس کی عمر میں انتقال کر گئے تھے۔ ان کی وفات کے بعد پرانے تنازع پر ہونے والی نئی بحث نے ایک بار پھر بھارتی فلم انڈسٹری میں می ٹو مہم اور جنسی ہراسانی کے الزامات سے متعلق گفتگو کو نمایاں کر دیا ہے۔
