بھارتی کرکٹ بورڈ نے نیوزی لینڈ کے خلاف دو ٹیسٹ میچوں کی سیریز کے لیے جسپریت بمراہ اور رشبھ پانت کو اسکواڈ میں شامل کرلیا ہے۔
تاہم وکٹ کیپر بیٹر رشبھ پانت کی سیریز میں شرکت کا فیصلہ فٹنس کلیئرنس سے مشروط ہوگا۔بھارت اور نیوزی لینڈ کے درمیان سیریز کا پہلا ٹیسٹ میچ 19 نومبر کو ویلنگٹن میں کھیلا جائے گا۔ بھارتی ٹیم کی قیادت شبمن گل کریں گے، جبکہ جسپریت بمراہ ٹیسٹ سیریز میں ٹیم کے بولنگ اٹیک کی سربراہی کریں گے۔
جسپریت بمراہ کی ٹیسٹ کرکٹ میں واپسی
جسپریت بمراہ کو ون ڈے اسکواڈ میں شامل نہیں کیا گیا، تاہم انہیں ٹیسٹ سیریز کے لیے اہم ذمہ داری سونپی گئی ہے۔ وہ نومبر 2025 کے بعد سے کوئی ٹیسٹ میچ نہیں کھیلے۔بھارتی ٹیم انتظامیہ بمراہ کے ورک لوڈ کو مدنظر رکھتے ہوئے ان کی فٹنس اور دستیابی پر توجہ دے رہی ہے، تاکہ انہیں آئندہ اہم مقابلوں کے لیے فٹ رکھا جاسکے۔ ان مقابلوں میں بارڈر گواسکر ٹرافی اور 2027 کا ون ڈے ورلڈ کپ بھی شامل ہیں۔
رشبھ پانت کی شرکت فٹنس سے مشروط
رشبھ پانت ایرانی کپ کے دوران سائیڈ اسٹرین کا شکار ہوگئے تھے، جس کے باعث وہ نیوزی لینڈ اے کے خلاف ابتدائی دو غیر سرکاری ٹیسٹ میچز میں شرکت نہیں کرسکے۔رپورٹس کے مطابق، پانت کی 7 سے 10 نومبر تک لنکن میں شیڈول تیسرے غیر سرکاری ٹیسٹ میچ میں شرکت متوقع ہے۔ ان کی مکمل فٹنس کا جائزہ لینے کے بعد ہی نیوزی لینڈ کے خلاف ٹیسٹ سیریز میں ان کی دستیابی کے بارے میں حتمی فیصلہ کیا جائے گا۔
بھارتی بولنگ اٹیک میں اہم کھلاڑیوں کی واپسی
بھارتی ٹیسٹ اسکواڈ میں آکاش دیپ اور انشول کمبوج کی بھی واپسی ہوئی ہے۔ اسپن بولنگ کے شعبے میں رویندرا جڈیجا، واشنگٹن سندر اور کلدیپ یادیو ٹیم کا حصہ ہوں گے، جو نیوزی لینڈ کے خلاف سیریز میں اہم کردار ادا کرسکتے ہیں۔شبمن گل کی قیادت میں بھارتی ٹیم ٹیسٹ سیریز کے لیے تیاری کرے گی، تاہم بعض کھلاڑیوں کی دستیابی فٹنس اور طبی جانچ سے مشروط رہے گی۔
